Parroquia de Queimadelos

Queimadelos, do latín cremare, diminutivo da voz queimar. Esta parroquia é a máis pequena do municipio pois tan só posúe 2 km2, e unha poboación de 93 habitantes, repartidos nos barrios de Aqueleido, A Ar- mada, A Portela e O Outeiro. É unha parroquia cunha forte personalidade, sendo unha das nove Entidades Locais Menores existentes en Galicia. Conseguiu este estatus no ano 1935.

En Queimadelos encontramos as mámoas da Armada 1 (42.222929, -8.440064), unha necrópole neolí- tica formada por dous túmulos, e a famosa área de esparexemento do Carballo da Armada 2 (42.223636,- 8.438454). Esta árbore ten varios centos de anos e é todo un símbolo natural, tanto para Queimadelos como para o concello de Mondariz. Á súa sombra fan parada obrigatoria as comitivas procesionais que acoden á Romaxe da Franqueira, celebrada cada ano o luns de Pentecostés. Ao regreso da Franqueira prodúcese un encontro multitudinario á beira deste carballo monumental. Máis ao Leste atopamos os gravados rupestres da Pedra das Nocellas (42.222929, -8.440064), dunha antigüidade de 4.000 anos, que consisten nunha serie de combinacións circulares concéntricas entrelazadas, gravadas sobre unha pedra situada a ras de chan.

Na súa igrexa parroquial de Santa María 3 (42.217660,-8.430998) non deixes de contemplar a súa pía bautismal románica, unha peza senlleira no ámbito da comarca do Condado que foi decorada, entre outros motivos, con relevos na súa copa, ondas que simbolizan a auga no exterior do cáliz e unha cruz. Esta artís- tica peza milenaria fálanos da existencia dun templo anterior de estilo románico.

Entre o seu patrimonio histórico destaca un lagar rupestre 4 (42.214475,-8.433795) único en Mondariz, situado nas proximidades do castro do Coto da Moura (Meirol). E se tes tempo non deixes de visitar as ribeiras do río Xabriña 5 (42.212147,-8.438929), un afluente do Tea que tamén forma parte da Rede Natura da UE, onde poderás atopar muíños coma o do Crego ou o do Zancaño.

 
quimadelos